З 14 па 18 лютага ў нашай установе адукацыі прайшоў Тыдзень беларускай мовы і літаратуры. Вучні 3-9 класаў змаглі дакрануцца да скарбаў нашай мовы.
Пачаўся Тыдзень з выставы-конкурсу газет, прысвечаных роднай мове. Настаўніцай Ралавец Анастасіяй Пятроўнай было праведзена пазнавальнае мерапрыемства ў форме гульні “Маўленчы рэпертуар” сярод вучняў 5 класа, якія актыўна ўдзельнічалі ў лінгваспаборніцтвах “Хто хутчэй?”, ”Скажы так”, “Сагрэйце словам”, “Чый партфель цяжэйшы?”, “Знаўца прыказак і прымавак”, “Доктар”, “Віншаванне”. Да гульні была падрыхтавана інсцэніроўка пра цудадзейную сілу ветлівага слова, развучана песня “Добрай раніцы” (музыка Л. Захлеўнага, словы Л. Пранчака) для музычнай паўзы.
На наступны дзень настаўніца Дудзінская Іна Тадэвушаўна разам з вучнямі 6 класа накіравалася ў цікавае “Падарожжа па краіне Мовазнавіі”. У лінгвістычным турніры вучні знаёміліся з залацінкамі роднай мовы, разгадвалі крыжаванку, малявалі. Прысутнічалі і элементы спаборніцтва.
У гэты ж дзень прайшла акцыя “Пісьменнікі і паэты-юбіляры – 2022” і адбыліся паэтычныя чытанні твораў гэтых аўтараў. Вучні пранікнёна, удумліва, з замілаваннем чыталі як вершаваныя творы, так і ўрыўкі з прозы.
Серада прынесла новыя выпрабаванні. 7-9 класы прынялі ўдзел у анлайн-спаборніцтве “Ці добра мы ведаем беларускую мову?”. Перамагла каманда 9 “А” класа, якая атрымала ўзнагароду.
17 лютага адбыўся Рэспубліканскі конкурс “Буслік – 2022”, у якім прынялі удзел 61 чалавек, што склала 30% ад усёй колькасці вучняў нашай школы.
І завершыўся Тыдзень літаратурна-музычнай кампазіцыяй “Нам засталася спадчына”, прысвечанай юбілею класікаў.
Напрыканцы Тыдня ўсе жадаючыя змаглі прыняць удзел у акцыі “Прызнанне ў любові да роднай мовы”, якая ўжо стала традыцыйнай у нашай установе. Самыя шчырыя, цёплыя словы падабралі вучні, выказваючы свае пачуцці.
